"Un dornad plu"
skrivet gant Youenn Gwernig
FF 95.00
|
Al levr-mañ e kaver ennañ barzhonegoù Youenn Gwernig bet embannet etre 1972 (An Toull en nor), 1976 (An diri Dir) ha barzhonegoù all bet skrivet abaoe. Ul lodenn vras anezho zo bet skrivet e New-York e-lec'h ma labouras etre 1957 ha 1969. Eno e tarempredas barzhed ar Beat Generation ha dreist-holl Jack Kerouac. An dastumad zo divyezhek, e brezhoneg hag e saozneg. Roet eo bet Priz Langleiz 1996 da Youenn Gwernig evit e varzhonegoù. |
War gein ar vro
Rec'hier, brug hag an avel
emaon war gein va bro
rec'hier dindan ar brug hag eskern
tud bet bev gwechall
Hendadoù :
en avel n'eus keloù 'met eus ar re vev.
Ar re varv zo marv
div pe teir gwech marv
marv evit mat
aet o eskern da boultr - pell zo -
relegoù, ludu,
ha ne vez ken klevet o mouezh en avel :
en avel n'eus keloù 'met eus ar re vev.
Emaon war gein va bro
tro-war-dro betek an dremmwel
tourioù parrezioù va bro
o beredoù leun a vleunioù degaset gant ar re vev
evit ar re nevez-varvet ;
karnelioù, relegoù ankouaet,
n'eus 'met mousc'hoarzh un ael kizellet e mein ar vro
evit ar re aet pell zo, pell zo,
da anaon.
Evit ar re-se du-hont,
eskern mesk-ha-mesk gant boteier-lêr
tokarnoù, hernajoù
douar estren
ha bidonioù merglet, n'eus netra.
Rec'hier, brug hag an avel
o kanañ war gein va bro :
'n e gan n'eus keloù 'met eus ar re vev.